ماذا ينتظر الاخوان ؟

سؤال يدور فى ذهنى كل يوم يستفزنى كثيراً وهو ماذا ينتظر الاخوان , او لماذا لا يريدون قيادات الاخوان ان يعلنوا انضمامهم للثورة المصرية , هل رغبة منهم فى استقرار البلاد كما يدعوا , ام لكى يستعدوا للانتخابات البرلمانية , ام خوفا من المجلس العسكرى , ام عدم ايمانهم بالثورة من الاساس , دعونى اولاً اشكر شباب الاخوان الذين تجاهلوا اوامر قيادات الجماعة و شاركوا فى الثورة المصرية منذ ليلة السبت , فهؤلاء وضعوا مصلحة البلد و حريته فوق اى اعتبار عكس القيادات الذين وضعوا مصلحة الجماعة واهدافها اهم من الوطن الف مرة , واتخذوا صف من يظنوا بأنه الأقوى وهو المجلس العسكرى لكى يحتموا به اذا فشلت لا قدر الله الثورة ويعلنوا عدم مشاركتهم فى هذه المظاهرات من الاساس , اما اذا نجحت الثورة فسيكونوا اول من يركب الموجة ويعلنوا ان شباب الاخوان كانوا متواجدين من الليلة الاولى للثورة , ولكن لن يكونوا هؤلاء الشباب الشرفاء كبش فداء مرة اخرى للجماعة , فقيادات الاخوان اعلنت يوم السبت عبر وسائل الاعلام انها لا تعترف بأى اخوانى نزل لأرض الميدان , فجماعة الاخوان المسلمين تحتاج الى ثورة يقوم بها شباب الاخوان الشرفاء للأطاحة بالقيادات التى لوثت اسم الجماعة

البلد دى " سارية " على حل شعرها

فوجئت منذ ايام ان عيد ميلاد طويل العمر يطول عمره و يزهزه عصره و ينصر على من يعاديه فى نفس يوم عيد الهالوين فى صدفة تحتاج الى تحليل عميق من اينشتاين مصر وصاحب النظريات العبقرية البروفيسور " عمرو مصطفى "
وفوجئت مرة تانية ان هذا اليوم سيشهد دخول مصر لموسوعة جينيس من خلال اطول سارية علم فى العالم

وفى نفس اليوم اللى قريت الخبر ده , كان عصام عطا - رحمه الله - قد توفى فى السجن نتيجة التعذيب
وطبعا بما اننا عارفين ان الظباط عندنا " سو كيوت " و مبيمدوش ايديهم على حد " بيمدوا حاجات تانية " , فطبعا كانت النتيجة ان وفاة عصام عطا كانت نتيجة ابتلاعه ل خالد سعيد سورى قصدى للفافة .. فعلا الاصدار الجديد للفافات بيخلى الواحد بعد ما يموت بيبقى وشه فيه دم و مضروب و جسمه بيجيب " ميه " من كل حتة .. دى لفافة قادرة ومفترية قوى

كل ده وعصام شرف كالعادة مختفى , لم يخطأ استاذنا الكبير جلال عامر عندما قال " لما اخترنا عصام شرف من التحرير كان لازم نختار واحد يدورلنا عليه " , عصام شرف لا يظهر الا فى المناسبات القهرية زى " وفاة ولى العهد السعودى " فكان عصام شرف اول الحاضرين لتعزية السفير السعودى , بينما عندما توفى 3 اشخاص فى يوم واحد بضحايا تعذيب مختلفة , اختفى كالعادة

وما بين محاكمات عسكرية و ضحايا تعذيب و عدم تسليم سلطة و تنفيض للشعب .. ارى ان اللى عملناه كان شبه ثورة زى " شبه الجملة كده " فالأولى مش عارفة تبقى ثورة و التانية مش عارفة تبقى جملة ..

مش همضى بأسمى عشان ملقاش مصير علاء عبد الفتاح .. وشكرا

مين اللى كلف المجلس العسكرى ؟؟

هل ستضيع الثورة ؟؟ .. سؤال اسأله لنفسى كل يوم و انا أرى المجلس العسكرى يغتصب حقوقنا و أمالنا و احياناً ارواحنا و كأننا لم نقم بثورة ابداً و تبقى الاجابة الوحيدة لسؤالى و الاجابة عبارة عن سؤال " هو مين اللى كلف المجلس العسكرى لحكم البلد " ؟

انت يا كابتن ايوة انت , هو انت طلبت ان المجلس العسكرى هو اللى يمسك البلد ؟ .. طب والنبى يا انسة ياللى هناك , مش بعاكس متخافيش انا كنت بس عايز اسألك هو انتى اللى طلبتى ان المجلس العسكرى انه يحكم البلد ؟؟

طب ما تيجوا نرجع " فلاش باك " بلغة السينمائيين لخطاب التنحى الشهير الذى ألقاه الراجل اللى قدام الراجل اللى ورا عمر سليمان

" ايها المواطنون .. فى هذه الظروف العصيبة التى تمر بها البلاد , قرر الرئيس محمد حسنى مبارك تخليه عن منصب رئيس الجمهورية و كلف المجلس الاعلى ..... ) .. ستوب هنا معلش

وكلف .. وكلف .. حسب معلوماتى الضعيفة فى اللغة العربية واللى بنجح فيها بالعافية كل سنة , ان كلمة كلف دى عايدة على الشخص اللى قبلها .. اينعم محمد حسنى مبارك , الفاسد و المرتشى و الطاغية اللى قمنا ضده بثورة بكل سهولة تنحى بس ازاى يتنحى
هو فيه طاغية بيتنحى بالسهولة دى , بس لازم نهدى الناس اللى فى الشارع .. فتنحى هو وكلف .. معلش ستوب تانى مش المفروض
فى الثورات ان اللى بيكلف هو الناس اللى قاموا بالثورة ؟؟ .. معنى كده ان محمد حسنى مبارك اللى بنثور عليه لبس زى الثورى
وكلف المجلس العسكرى " اللى حمى الثورة " ( حركة انعواج  يميناً و يساراً للفم بتقوم بها السيدات )

نعم نحن قمنا بنصف ثورة , جلعنا الطاغية يرحل .. بس سابلنا شوية طواغى كده صغيرين مقطقطين ويتربوا فى عز الشعب المصرى

وكما بدأت المقالة الصغيرة دى بسؤال .. هنهيه بسؤال

هل سننقذ الثورة ؟

احمد خالد